-
التجارب الإنسانية اللي ممكن يمر فيها أي شخص .. كثير أحيان ممكن تكسبه مهارات كثير سواء بالتعاطي مع الأمور أو حتى بتغيير شخصيته للأفضل .
ليش إحنا ممكن نقسى على أنفسنا لما ما ننجح بتجربه معينة ؟
ليش نعذب أنفسنا بأسئلة الـ ( لو ) .. هي تجربة مرت فينا إستفدنا من كل شيء فيها .. إوك خسرنا ناس كسبنا ناس ..
ألمنا الفقد .. و أوجعنا إحساس اللامبالاة اللي مرينا فيه وقد نكون لازلنا نمر فيه .. لكن إلى متى ؟
كل يوم فيه صفحة جديدة بيضاء وحلوة تنفتح بكتاب عمرنا إلى متى نملاها سواد ؟
إلى متى وإحنا نحشيها دموع وعذاب وإحساس فظيع بتأنيب الضمير رغم إننا ما سوينا شيء خطأ .. إحنا بس مشينا وراء قلوبنا ..!
إيوة مو خطأ إنه نتبع إحساسنا..
كثير أحيان الواحد فينا يقول:
أنا الغلطان .. عشان مشيت وراء قلبي ..
أنا الغلطان .. عشان ما فهمت كل شيء صح بوقته ..؟
كيف بتفهم كل شيء بوقته وإنت ما خضت التجربه .. وما دفعت ثمنها ؟
تبي تفهم وتستفيد وتقوى ببلاش ؟
تبي يكون عندك مهارات وشخصيه مصقولة وحلوة وفاهمة كذا .. بدون ما تدفع حق التجربة .. مرارة .. غصة قلب .. إبتسامة سخرية من شيء ما ..!!
لمعة عيونك تظنها سهله .. لا هذي ثمنها شيء فيه قهر أو ظلم .. لكن لبكرا هي شيء كويس ..!!
لبكرا هي تعليم لك ولسعة على يدك إنه يا فلان هذا الشيء مو صح .. خلاص ستوب ولا تسويه ..!!
عن نفسي كل شيء مريت فيه علمني .. مثل كل الناس فيه دموع .. فيه ظلم .. فيه قهر .. فيه تعدي .. فيه خذلان .. فيه سعادة إنخطفت مني ..!
فيه ناس أشتاق لهم .. يا الله وش قد أشتاق لهم .. لكن ما زلت أبتسم .. و أعدي كثير مواقف .. !!
إكتئبت فترة مثلا وفقدت الثقة بالناس ..وقاطعت الكل..وفي مره وقفت قدام المراية و إبتسمت لقيت إبتسامتي حلوة ليش أحرم نفسي منها ، وعشان مين ؟!
ماأعرف ليش الإنسان فينا دايم يردد أنا مالي حظ؟
أنا ما قد إنبسطت بشيء ..!
أنا أكره نفسي وحياتي ..!
أنا إنظلمت وعانيت ..!
طيب ونعم ربي وين رآحت ..؟!!
كل وآحد فينا غارق بخير ربي ويجحده وما يحمد ربي على النعمة وشاطرين إحنا بس بالتذمر ..! ننسى كثير موضوع ( الخيرهـ ) صح ..؟!
والله ما صارت لي مصيبة بلعت فيها تذمري بالحمدلله وإقناع نفسي إنها ( خيرهـ ) إلا عوضني ربي خير مما كنت فيه ..!
في المقابل تمر فيني لحظات زيكم يغلبني الشيطان وأتذمر ويضيق صدري وأزعل .. لكن بس أصلي ركعتين أفضفض فيها لربي بسجودي إلا غسل الله همي ..!
صديقه لي تقول لي .. وش فيك إنتي باردة .. ما تعترضين ما تزعلين .. مو شرط ترى الكل يلاحظ عليك الضيقه ..؟
فيه ربي أحن وأرحم من الناس هو وحده سبحانه اللي بيده الحل والربط ..
الناس وش بتسوي ؟
بتشفق علي ؟
بتواسيني ؟
وبعدين بتقول في سرها ويمكن لغيرها .. يا حرام وش قد فلانه مسكينه ..!!
سرك ما راح يظل سر إذا طلع من صدرك .. تأكدوا من هالشيء ..!
أنا مو بحاجه لشفقة أحد أنا بحاجة لربي بس يوقف جنبي وأنا ما أستعجل الفرج بالعكس أستلذ بلحظات الصبر والأجر الكبير اللي ينكتب في صحيفة اعمالي .
كلنا غرقت وسايدنا ..!
كلنا بحاجة حضن من شخص ما ..!
ما أحد يقدر ينكر أو يكابر ..!
ليش نشكي في BB أو في تويتر أو للناس ..؟؟!!!
ليش ما نشكي لربي ..؟!!
ليش ما نقول لربي :
أنا يا ربي أبي هالشيء ..
دخيلك أنا واقفة على بابك اللي ما ينرد فيه أحد .. دخيلك يا حبيبي أنا بحاجه لهالنعمة عطني إياها .. تفضل علي فيها .. أكرمني يا الله دخيلك فأنت القوي ونحن عبادك الضعفاء .
صدقوني ربي أرحم وألطف من إنه يخذلكم مهما طالت مدة الصبر .. مهما طال الوقت ..!!
ممكن نوصل لليأس .. ربي يحبنا .. يختبر إيماننا .. يعطينا .. حسنات كثير عشان صبرنا .. وفيه أحلى من :
[ وَبَشِّرِ الصَّابِرِينَ * الَّذِينَ إِذَا أَصَابَتْهُم مُّصِيبَةٌ قَالُواْ إِنَّا لِلّهِ وَإِنَّا إِلَيْهِ رَاجِعونَ *
أُولَئِكَ عَلَيْهِمْ صَلَوَاتٌ مِّن رَّبِّهِمْ وَرَحْمَةٌ وَأُولَئِكَ هُمُ الْمُهْتَدُونَ ] .
&
[ إِنَّمَا يُوَفَّى الصَّابِرُونَ أَجْرَهُمْ بِغَيْرِ حِسَابٍ ] .
نستحلي فيها مرارة الدمعة وتعطينا قوة لقدام ؟
صدقوني الحياة أحقر وأصغر وأقصر من إنه ندفن أنفسنا في وجع سنين عدت ..!!
الأدهى إننا مازلنا مشتاقين .. لكن ( الكرامة ) توقف دون إستمرار حياة حلوة ..!!
عن نفسي من فترة أتصرف بتجاهل كبير لردات فعل الناس ..!!
أسوي اللي بخاطري أسويه واللي مقتنعه فيه ..
في خاطرك تقول : ( أحبك ) لشخص مين ما كان ..
قولها ..
مشتاق لأحد عبر له ..
زعلان من أحد عاتبه .
كثير من صديقاتي ينقدون علي إنه مو حلو الواحد يعبر عن مشاعره بالكلام .. على أساس عواطفنا مو عطشانه لهالشيء ..!!
يعني ما نحتاج لكلمة لطيفة من أم أو أب أو إخت أو أخ أو صديق أو زوج ؟
ليش جحود إحتياجات النفس ؟
ليش إنكار المشاعر ( الإنسانية ) ..؟
سهل نكره صح و نعبر عن غضبنا وإنه إنت ظلمتنا وقهرتنا و زعلتنا .. بس نتغلى لما نحب ..!!!!!!
نترفع عن إنه نشتاق ..
إنه إيش أنا أشتاق ..؟!
أنا ما أشتاق لأحد ..
أنا أكبر وأعظم من إني أحتاج للناس أو لشخص معين ..!
أو قلبي يدق لأحد!
معليش بس .. ( إستريح ) .. الكذب مو زين .. طيب .. كلنا عايشين وبنموت على العاطفة .. ما احد يقدر ينكر هالشيء ..!!
أنا لما أعبر عن حب عن شوق عن شكر عن إعجاب بعمل ما .. أسعد نفسي أول على فكرة ثم أسعدك .. !!
أشبع فيني شعور الإنسانية والعطاء والحب والشوق .. وأشبع فيك غرورك .. عاطفتك .. إحساس إنك شخص رائع وجهودك مقدره ..!
نصيحة أخيرة :
( لا تضيع أعماركم بتخليص حسابات مع الأخرين .. عيشوا ببساطة .. بإبتسامة رضا .. بتفاؤل .. بمحبة صادقة .. و بوجه واحد ) ..!
( أحبوا بصدق وأعلنوا محبتكم .. زمن الكتمان فات .. إمنحوا أنفسكم وأحبابكم الفرص .. أعيدوا العلاقات المقطوعة .. عالجوا الجروح الموجعة .. و ناموا مطمئنين ) .
ليست هناك تعليقات:
إرسال تعليق